ORRI ZURIA

Libre naiz orri zurian.

Orririk gabe, libertate eza.

Orri gabekoa, preso.

INOIZKO TESTUAK

 

Inoiz irakurriko ez diren testuak

tiraderan daude zain eta zain.

Egunen baten, behingoz, botako

ditut

ahanzturaren zakarrontzira.

 

 

 

EZER GORDERIK EZ

Jada ez dut gordetzen

jasotako gutunik,

zikindutako paperik,

ezkututako musurik.

Jada ez dut ezer gordetzen,

ni neu salbu.

BARKA NAZAZU

Barka nazazu urrun egon banaiz.

Barka nazazu hurbilegi izanez gero.

Barkatu gogo barik.

Barkatu indarrez.

JO

Jo nazazu bihotzean; minik ez egin.

Jo nazazu buruan; maite zaitut berdin.

Jo nazazu benetan; jotzea gezurretan denean.

NOR ZARA?

Zenbakia naiz ni.

Nor zara zu?

Kantitatea baino ez.

Nor zara zu?

Kantitatea: pisua, altuera,

koipea, ura…

Neu naiz: analisi kimikotik

aurrerako oro, hori.

ZERTAN?

Ez du zertan egon,

egonda banago ere.

ETA ORAIN?

Amaren bularrak babesa

ematen zidan .

Irakaslearen jakintzak

ziurtasuna.

lagunen konfiantzak

lasaitasuna.

Gizon baten maitasunak

indarra.

Eta orain?

Ez dakit non dauden,

ezta non nagoen ere.

NON?

Non ote dago isiltasuna

zarataz betetako munduan?

Non ote nago neu?

Neu: isiltasuna.

HIZTEGIA

Faltan zaizkidan hitzak

hiztegian bilatzen ditut.

Ezagutzen ez ditudanak

aurkitzen saiatzen naiz.

Non ote daude, ordea,

zalantzazkoak?

UKITU GABE

Azala ukitu gabe, laztandu.

Azala ukitu, laztandu gabe.

Zein zaila den

Azala ukitu gabe

laztantzea.

Azalpekoa

azaleratzea,

azalekoa

azalatzea.

Zein zaila den

ukimena erabili gabe,

ukitzea.

Ukiezina

ukigarri bihurtzea.

Azalik gabe ukitu, laztana.

Azala laztandu gabe, ukitu.

 

OINETAN LOKARRI

 

Oinetan lokarri, eta zer?

Askatasunak kaka egin dit.

Oinetan lokarri, eta zer?

Jasanak jasan.

Eta zer?

Oinetan lokarri.

ZALANTZAK

 

 

Zalantzak azaltzen zaizkit

gosarian, bazkarian, askarian,afarian…

Zalantzak azaltzen zaizkit

esnatzean, jaikitzean, loak hartzean…

Zalantzak azaltzen zaizkit

jantzean eta eranztean

Beti ahalegindu naiz

zalantza horiei guztiei kontra egiten.

Baina hasi naiz konturatzen

haiei esker bizi naizela.

Zer nintzateke ni haiek barik?

Ez nintzateke ni izango,

eta ni duda hutsa naiz.

Horrelakoa naiz ni.

Eta horrekin bizitzen ikasten ari naiz.

MAKULUAK